„არა-ფობიას“ მიმართვა ცესკოს პატრიოტთა ალიანსის თურქოფობიულ კლიპთან დაკავშირებით

26 სექტემბერს სამოქალაქო პლატფორმაში “არა ფობიას” შემავალმა ორგანიზაციებმა ცენტრალური საარჩევნო კომისიის თავმჯდომარეს მიმართეს და პატრიოტთა ალიანსის თურქოფობიული შინაარსის სარეკლამო კლიპის კანონიერების საკითხის შესწავლა მოითხოვეს. 5 ოქტომბერს ცესკომ აღნიშნული მიმართვის საფუძველზე სამართალდარღვევათა ოქმი შეადგინა.

მედია მონიტორნგი

ქვემოთ მოცემულია 1-30 სექტემბრის პერიოდში გამოვლენილი ცალკეული შემთხვევები. აღსანიშნავია, რომ ამ პერიოდში განსაკუთრებით იმძლავრა თურქოფობიულმა განწყობებმა, რომელთა წყარო ძირითადად პატრიოტთა ალიანსი იყო:

სიძულვილის ენა/ ფსიქიკურად დაავადებულთა დისკრიმინაცია

PIA, 30 აგვისტო 

ირმა ინაშვილი, პატრიოტთა ალიანსი: "2003 წელს, როდესაც დემოკრატიის სახელით, ჰუმანიზმის სახელით, მაღალი იდეალების სახელით, ხელისუფლებაში მოვიდა ფსიქიურად დაავადებული პოლიტიკოსების ჯგუფი [ნაციონალური მოძრაობის წევრები],  რომლებმაც ჯერ კიდევ ბავშვობაში მიიღეს ფსიქიკური ტრავმები და შემდეგ უკვე მოვიდნენ ხელისუფლებაში და ეს გაბოროტება გადმოიტანეს და გადმოანთხიეს საზოგადოებაზე". 

ასავალ-დასავალი, 12-18 სექტემბერი

გიორგი გიგაური, ჟურნალისტი: საქართველოში თუკი ვინმეს შეიძლება „სატანის მოციქულები“ და „ეშმაკის მიმდევრები“ ეწოდოს, ეს სწორედ რესპუბლიკელები არიან!...რესპუბლიკელებს ისე სძულთ ქართული ეკლესია და მართლმადიდებლობა, რომ დასავლეთელი პატრონებისა და სატანის დასანახავად, „პოლიტიკური მიზანშეწონილობის“ გათვალისწინებითც კი არ დადიან ტაძრებში!...

რასიზმი

ასავალ-დასავალი, 12-18 სექტემბერი

სანდრო ბრეგაძე, ქართული იდეა/ეროვნულები: აზიისა და აფრიკის ქვეყნების წარმომადგენლებს ჩამოვართვათ საქართველოში ბინადრობის უფლება და მოვახდინოთ მათი დეპორტაცია.  შევქმნათ ახალი, მკაცრი საემიგრაციო კანონმდებლობა”.

თურქოფობია

ობიექტივი, ახალი ამბები; 21 სექტემბერი 

ირმა ინაშვილი, საქართველოს პატრიოტთა ალიანსი: "ბათუმში თურქული სკოლის გახსნის ფაქტი, ეს უკვე ნიშნავს იმას, რომ ხორციელდება იდეოლოგიური ექსპანსიაც. ქართული სახელმწიფოს ფარგლებში თურქული სკოლის გახსნა, სადაც თურქეთიდან მოწვეული პედაგოგები არიან, თურქეთის განათლების სისტემის მიხედვით წავა სწავლება. ეს არ ემსახურება ჩვენი ქვეყნის სახელმწიფოებრივ ინტერესებს."

ობიექტივი, პოლიტიკური ღამე, 8 სექტემბერი

მამული ჟღენტი, პატრიოტთა ალიანსის ბათუმის მაჟორიტარობის კანდიდატი: „თურქეთი ყოველთვის ჩვენი მტერი იყო, ისტორიული მტერი და იყო და დარჩა… ესეიგი ხელისგულზე ჩანს, რომ მთავრობა არი უკვე დაინტერესებული, რომ თურქი აქ საქმიანობდეს, აქ ჩამოდიოდეს, ცოლი მოიყვანოს, აქ დასაქმდეს და აქ გამრავლდეს. ეს უკვე მთავრობამ უნდა შეიმუშაოს ისეთი გეგმა, რომ ეს არ მოხდეს.“ 

საქართველო და მსოფლიო, 7 სექტემბერი

ბაკურ სვანიძე, მემარცხენე ალიანსი: " რელურად რუსეთს ჩვენს ქვეყანაში არა რაიმე ამერიკულ-ევროპული დემოკრატიული ღირებულებები, არამედ ნატოს ტყავში გახვეული ოსმალეთის იმპერია უპირისპირდება… აბა, რატომ გვიკვირს, რომ რუსეთი, რომელიც აშკარად უფრო ჰუმანურად მოექცა 100 წლის წინათ დაპყრობილ ქართულ ტერიტორიებსა და მოსახლეობას, ვიდრე მეორე, გაცილებით აგრესიული და საშიში დამპყრობელი _ თურქეთი, ახლა “ნანობს” საკუთარ “ჰუმანურობას” და ფიქრობს, _ მოვქცეულიყავი მეც მეტოქე თურქეთივით, გამენადგურებინა ყველაფერი ქართული დაპყრობილ ქართულ მიწებზე, ამეკრძალა ქართული ენა, მომესპო მათი ეროვნულობა, ალბათ, ახლა მეც მომიბრუნდებოდნენ ქართველები და “ისტორიულ მეგობრად” გამომაცხადებდნენ, თუ არა, ტერიტორიები მაინც უპრობლემოდ შემრჩებოდაო."

ქსენოფობია

რელიგიური ნიშნით დისკრიმინაცია

IPN, 29 სექტემბერი, მარშალპრესი, 30 სექტემბერი 

რომის პაპის საქართველოში ჩამოსვლის წინააღმდეგ საპროტესტო აქციის მონაწილეები: "ეს ადასტურებს ჩვენს ეჭვებს იმასთან დაკავშირებით, რომ პაპი ჩამოდის თავისი მწვამებლური, ცრუ სწავლების, ე.წ. პაპიზმის საქადაგებლად, პაპიზმის გასაძლიერებლად საქართველოში, პროზელიტური მიზნით, რაც, პირველ რიგში, შეურაცხყოფს ჩვენი განმანათლებლების, მოციქულების – ანდრეა პირველწოდებულის, მატათასა და სიმონ კანანელის, მოციქულთა სწორის, წმ. ნინოს წმინდა სახელებსა და ღვაწლს, მიმართულია მართლმადიდებლობის წინააღმდეგ”.

ჰომოფობია

კავკასია, ბარიერი, 1 სექტემბერი

დიმიტრი ლორთქიფანიძე, გაერთიანებული დემოკრატიული მოძრაობა:  ძვირფასო ჩემს შვილებს ეხება და რვა მყავს ეს შვილი და არა მაქვს უფლება ჩემი შვილები დავიცვა ამ მავნე ზეგავლენისგან [ჰომოსექსუალობა]?!

საქინფორმი, 14 სექტემბერი

არნო ხიდირბეგიშვილი, საქინფორმის რედაქტორი: "ახლა ბევრი დაიბნა - არ იციან, ვის დაუჯერონ... სანიმუშო მეოჯახე ივანიშვილს, რომელიც გამუდმებით აცხადებს, რომ მისი პირადი და დიდი დამსახურებაა პარლამენტის მიერ ანტიდისკრიმინაციული კანონის მიღება? კანონისა, რომელიც პედერასტებს ჰეტეროსექსუალური უმრავლესობის უფლებების დარღვევის ხარჯზე იცავს? თუ მის მიერ დასმულ კვირიკაშვილს დაუჯერონ, რომელიც, პირიქით, გვპირდება, კონსტიტუციაში აუცილებლად შეიტანოს ჩანაწერი, რომ ქორწინება მამაკაცისა და ქალის ერთობაა?!"

ანტიდასავლური განწყობები

ასავალ-დასავალი, 26 სექტემბერი -2 ოქტომბერი 

სანდრო ბრეგაძე, ქართული იდეა/ეროვნულები: "...ქართველ საზოგადოებას კი ეტყვიან, კაცს-კაცზე და ქალს ქალზე თუ არ დავაქორწინებთ, ევროკავშირსა და ნატო-ში არ მიგვიღებენო. ავადსახსენებელი „ანტიდისკრიმინაციული კანონიც“ უცხოელებმა ზეწოლით მიაღებინეს საქართველოს პარლამენტს და ერთნაირსქესიანთა ქორწინებასაც ასეთივე ზეწოლით დააკანონინებენ!"

ობიექტივი, 17 სექტემბერი

ლაზარე ზაქარიაძე, პოეტი : „ფეთქდება უკვე ევროპული ქალაქები , „ფესვის უარყოფის“ გამო, გეი ფსიქოლოგიის იურიდიული დაკანონება არის ირიბი მიზეზი.“

დისკრიმინაციული გამოხატვის მაგალითები სრულად იხილეთ ვებ-გვერდზე: www.notophobia.ge